PAWIYATAN - GEGURITAN

PAWIYATAN

Anggitanipun Mpu Dzikir Musafir

Aneng bangku kayu jati galih nangka

aku wiwit bisa maca aksara-aksara a-be-ce-dhe

uga a-lif-ba-ta lan ha-na-ca-ra-ka

aneng pawiyatan iki aku wiwit bisa mbadhe

maknane basa, tata-krama lan budaya

Aneng sekolahan iki aku meguru ngudi ilmu

bobote timbangan lan etungan angka-angka

wewadine manungsa lan alam arcapada

Buku-buku iku sejatine cendhelane donya

tanpa maca manungsa kadidene wuta

bapa-ibu guru iku pandoming langkah

kang nuntun siswa lan tansah aweh pitedah

aja nganti dina sesuk salah arah

tegal sawah, blumbang lan kembang tunjung biru

nancepake tresnaku mring lemah wutah-rahku

Aneng kene, aneng pawiyatan iki

aku sinau pralambange mangsi abang-biru

kanggo ngukir pangaki sajroning panguripanku

2013, Purworejo

(saka: kumpulan ‘Wisik Lembanyung’, 2012) 

/ materi lomba geguritan